«Ինֆոքոմ» լրատվական հարթակը ստեղծել է 2020 թվականի Արցախյան 44-օրյա պատերազմի վերաբերյալ մշտադիտարկման գործիք, որը պարունակում է Արցախում և Արցախի շուրջը տեղի ունեցած ռազմաքաղաքական իրադարձությունների վերաբերյալ հայտարարություններ և տեղեկություններ։ Հարթակում ընդգրկված են 2020 թվականի սեպտեմբերի 10-ից նոյեմբերի 30-ն ընկած ժամանակահատվածի տվյալներ։
«44-օրյա պատերազմ. ժամանակագրություն» հարթակի nk-conflict.infocom.am կայքի գլխավոր էջում հղում կա դեպի մշտադիտարկման գործիքը։ Գործիքի էջն անցնելու համար հարկավոր է մկնիկի ձախ սեղմակը սեղմել «Օգտագործել գործիքը» կոճակի վրա: (Նկար 1)
Գործիքի էջի ձախ մասում առկա «Ընտրել ժամանակահատվածը» կոճակի վրա մկնիկի ձախ սեղմակը մեկ անգամ սեղմելուց հետո կբացվի օրացույցի պատուհան, որի միջոցով պետք է ընտրել անհրաժեշտ օրը, ապա սեղմել «Հաստատել» կոճակը։ Դրանից հետո համակարգը կներկայացնի ընտրված ժամանակահատվածի վերաբերյալ ամբողջ տեղեկությունը: (Նկար 2)
Ժամանակահատվածն ընտրելուց հետո «Ավելացնել ֆիլտր» գործիքի միջոցով հնարավոր է նեղացնել, կոնկրետացնել փնտրման շրջանակը։ Օրինակ՝ «Ավելացնել ֆիլտր» կոճակի վրա մեկ անգամ մկնիկի ձախ սեղմակը սեղմելուց հետո, առաջարկվող տարբերակներից ընտրելով «Անձ» տարբերակը, ապա առաջարկվող անձանցից ընտրելով «Նիկոլ Փաշինյան» տարբերակը և սեղմելով «Հաստատել» կոճակը, համակարգը կառանձնացնի ընտրված ժամանակահատվածում «Նիկոլ Փաշինյան» անձի հրապարակած տվյալները/հայտարարությունները: (Նկար 3)
Անհրաժեշտ ժամանակահատվածը, ապա զտման միջոցով տեղեկատվության աղբյուրն ընտրելուց հետո համակարգը կներկայացնի ժամանակագրորեն իրար հաջորդող տվյալները՝ վերնագրերով։ Հայտարարությանն առավել մանրամասն և ըստ անհրաժեշտության սկզբնաղբյուրում ծանոթանալու համար հարկավոր է մկնիկի ձախ սեղմակը մեկ անգամ սեղմել հայտարարության վրա, ապա` բացվող պատուհանի ներքևի մասում առկա «Բացել աղբյուրը» կոճակը: (Նկար 4)
«44-օրյա պատերազմ. ժամանակագրություն» գործիքը հնարավորություն է տալիս նաև համեմատական վերլուծություն կատարելու։ «+» կոճակի միջոցով հնարավոր է ընտրել ևս մեկ աղբյուր և մեկ էջում զուգահեռ տեսնել հայտարարությունները։ Օրինակ՝ արդեն իսկ մեկ աղբյուր ընտրելուց հետո «+» կոճակը մկնիկի ձախ սեղմակով մեկ անգամ սեղմելուց հետո կառաջարկվի «Ավելացնել ֆիլտր» գործիքը: (Նկար 5)
Անհրաժեշտ է իրականացնել «Ըստ տեսակի» զտում, որի դեպքում ընտրելով «Ըստ անձի» տեսակը, ապա, օրինակ, «Իլհամ Ալիև» անձը և հաստատելով ընտրությունը, համակարգն իրար կողքի կզետեղի «Նիկոլ Փաշինյան» և «Իլհամ Ալիև» անձերի հայտարարություններն ըստ ժամանակագրության: (Նկար 6)
Վերը ներկայացված տրամաբանությամբ հնարավոր է նաև այլ կերպ զտում կատարել։
