«Հետք»-ի տվյալների լրագրության հավելվածում տեղեկություններ կան բարձրաստիճան պաշտոնյաների ունեցվածքի և փոխկապակցվածության մասին։
Data.hetq.am հարթակի գլխավոր էջում որոնման համակարգ կա, որի միջոցով հնարավոր է ընտրել պետական պաշտոն զբաղեցրած և զբաղեցնող պաշտոնյային՝ գրելով նրա ազգանունը, ապա՝ անունը։ Հարթակում հնարավոր է զտել պաշտոնյայի վերաբերյալ տեղեկությունը «ըստ դրամական միջոցների», «ըստ կապերի» և «ըստ եկամուտների»: (Նկար 1)
Եթե անհրաժեշտ է ուսումնասիրել ոչ թե կոնկրետ պաշտոնյայի, այլ որևէ պետական մարմնի պաշտոնյաների՝ data.hetq.am-ի բազայում առկա ցանկից, ապա անհրաժեշտ է որոնման դաշտում նշել «ընտրել մարմինը» տարբերակը: (Նկար 2)
Այցելելով «Պաշտոնյայի ազգանուն, անուն»-ով էջ` կտեսնեք պաշտոնյայի կենսագրությունը, դրա ներքևի մասում՝ պաշտոնյայի կապերի մասին ինտերակտիվ սխեման: (Նկար 3)
Սխեմայի վերևի մասում նշումներ կան փոխկապակցված անձանց կապերի տեսակների մասին (ամուսին, եղբայր, ծնող և այլն): Մկնիկի ձախ սեղմակը սեղմելով պաշտոնյաների կամ նրանց հետ փոխկապակցված անձանց անունների վրա՝ կընդգծվի նրանց հետ ուղիղ կապ ունեցող անձանց շրջանակը։
